ᐊᖑᕕᒐᖅ

Natalino Piugattuk: ᑖᓐᓇ ᓴᒃᑯᑐᑦ ᐋᖅᑭᒃᓯᒪᖅᑰᔨᔫᒐᓗᐊᖅ ᐊᑎᖃᖅᑐᖅ ᐊᖑᕕᒐᐅᑦ.

ᐊᖑᕕᒐᐅᑎᑐᐃᓐᓇᖅ ᑖᓐᓇ [ᓇᑕᓕᓅ ᑐᒃᑯᐊᖅᐳᖅ ᑭᓱᓕᒫᓂᑦ ᓵᒦᑦᑐᓂᑦ] ᐅᓇ ᐊᖑᕕᒐᕈᑕᐅᒐᒥ ᑮᓇᖓ.

ᑮᓇᖓ ᐱᐅᖁᓗᐊᒧᑦ ᑖᓐᓇ ᑕᒡᕗᖓ ᐃᓕᔭᐅᓯᒪᐃᓐᓇᐅᔭᖅᖢᓂ [ᓇᑕᓕᓅ ᐴᖅᓯᔪᖅ ᓴᕕᕋᔭᖕᒥᒃ ᐴᖕᒐᓄᑦ].

ᐊᑐᖅᑕᐅᓂᐊᓕᕌᖓᒥ ᑭᓯᐊᓂ ᐲᖅᑕᐅᕙᒃᖢᓂ. ᑖᓐᓇ ᐅᓈᖃᖅᖢᓂ

ᐃᐱᐅᑕᖃᖅᖢᓂ, ᐅᓈᖃᖅᖢᓂ ᓂᕐᔪᑎᓄᑦ ᐊᖏᔫᑎᐅᒐᓗᐊᓄᑦ

ᑕᒪᒃᑯᓄᖓ ᐊᐃᕕᕐᓄᑦ, ᕿᓚᓗᒃᑲᓄᑦ ᓇᐅᓕᒃᓯᒪᔪᓄᑦ

ᐊᑐᖅᑕᐅᔪᖅ ᑎᒍᑐᐃᓐᓇᕆᐊᖃᙱᑦᑐᓄᑦ. ᑕᐃᒃᑯᐊ ᑕᒪᐅᓇᑐᐃᓐᓇᑦᑕᐅᖅ

ᑭᓯᐊᓂ ᑖᔅᓱᒧᖓ ᐊᖑᕕᒐᖅᑕᐅᓲᖑᙱᒻᒪᑦ ᑕᖅᑐᐊᖓ ᓇᓕᖅᑯᒋᐊᖅᐸᒃᖢᒍ

ᑕᒡᕙ ᑕᐃᒃᑯᐊ ᑖᔅᓱᒧᖓ ᐊᑐᖅᑐᑦ, ᐊᑐᖅᑐᖅ ᑕᐃᓐᓇ

ᑕᒡᕙ ᐱᒋᐊᕋᒥ ᓂᕐᔪᑎᒧᑦ ᐊᐃᕕᕐᒧᓪᓘᓐᓃᑦ ᕿᓚᓗᒃᑲᒧᓪᓘᓐᓃᑦ.

ᐊᐃᑦᑖᓚᓪᓗᓂ, ᐅᕙᒎᒍᓂᓕ ᓇᐅᓕᒃᓯᔪᐊᓐᓅᒐᒥ ᐊᓕᐊᓇᐃᒍᓱᒃᑲᔭᖅᖢᓂ

ᑕᐃᒃᑯᐊᓕ ᑖᔅᓱᒧᖓ ᐊᖑᕕᒐᕆᐊᖅᑐᑦ ᑕᐃᒪᙵᓕᒫᖑᖅᑰᔨᔪᖅ

ᐱᒋᐊᕋᒥ ᐊᐃᑦᑖᓚᓪᓗᓂ. ᑕᒡᕙ ᑐᖁᓴᑦᑎᐊᕐᓂᐊᖅᑖᓗᐊ.

ᐊᓕᐊᓇᐃᒍᓲᔭᕈᓗᒃᑯᓂ ᓴᓂᖅᑯᖦᖤᕐᓂᐊᕐᒪᒍ ᐊᐃᑦᑖᕈᓱᖅᑰᔨᓪᓗᓂ.

ᐅᓇ ᓴᒃᑰᖏᑦᑎᐊᖅᑐᖅ. ᑕᒡᕙ ᐱᓂᕐᓗᒃᑲᓗᐊᕈᓂ ᑐᖁᓴᙱᒃᑲᓗᐊᕈᓂᐅᒃ

ᓄᓱᑐᐃᓐᓇᕐᓗᓂᐅᒃ ᓇᒃᑎᒡᕕᖃᔮᙱᒻᒪᑦ [ᓇᑕᓕᓅ ᐅᓈᑉ ᓄᕗᖕᒐ ᐴᖅᐹ ᓂᕐᔪᑎᐅᖅᑰᔨᑎᑦᑐᓂᐅᒃ ᐊᒃᑐᓈᖕᒐᓗ ᓄᓱᒃᑐᓂᐅᒃ]. ᑐᖁᓴᖏᒃᑯᓂᐅᒃ ᑕᒡᕙᒃᓴᑐᐊᖑᖕᒪᑦ

ᖁᑭᐅᑎᖃᙱᓐᓇᒥ ᑖᓐᓇ ᓄᓱᑐᐃᓐᓇᕐᓂᐊᕐᒪᒍ ᑐᖁᙱᑉᐸᑦ ᑕᐃᖕᓇ.

ᐃᓛᒃ ᓄᓱᒃᑕᐃᓐᓇᖅᑕᕋᓗᐊᖓ ᑕᐃᑲᙵᑦ ᐊᖑᕕᒐᕆᐊᖅᖢᓂᐅᒃ.

ᐊᐃᑦᑖᓚᐅᔭᖅᐳᖅ ᑕᒡᕙ ᐱᒋᐊᑦᑎᐊᕌᓗᒃᑲᓗᐊᕐᓂᕈᓂᓘᓐᓃᑦ

ᐱᒋᐊᑦᑎᐊᖏᒃᑯᓂᓘᓐᓃᑦ ᐱᒋᐊᑦᑎᐊᕐᓂᐊᕋᓱᒋᙱᑐᐃᓐᓇᖅᖢᓂ

ᐊᐃᑦᑖᓚᔪᖅ. ᑕᐃᖕᓇ ᐊᖑᕕᒐᕋᓱᒃᑐᖅ ᑖᔅᓱᒧᖓ ᑐᖂᑦᑎᓇᓱᒃᑐᖅ

ᑕᐃᒪᓐᓇ ᐃᓕᖅᑯᓯᖅᑕᖃᖅᑰᔨᓚᐅᖅᑐᖅ ᑕᒡᕙ ᖃᐅᔨᓚᐅᕋᒃᑯᑦ ᑖᓐᓇ

ᐊᖑᕕᒐᖅ. ᐅᕙᖓᓕ ᓇᖕᒥᓂᖅ ᐊᑕᐅᓯᐊᕋᓗᐊᖅᖢᖓ ᓴᕕᖕᒧᑦ

ᐊᐃᕕᕐᒥᒃ ᐊᖑᕕᒐᖅᓯᒋᐊᙳᐊᓚᐅᖅᓯᒪᒋᕗᖓ ᑐᖁᓴᓪᓗᐊᖅᑕᑯᓗᒋᓚᐅᖅᓯᒪᒐᒃᑯ

ᐱᒃᑯᓕᓚᐅᖅᓯᒪᒋᕗᖓ. ᑖᓐᓇ ᐊᑐᖅᑕᐅᕕᒡᔪᐊᖅᑐᐊᓘᓚᐅᖅᑐᖅ ᑭᒃᑯᓕᒫᓂᑦ

ᖁᑭᐅᑎᖃᖅᐸᓚᐅᖏᒻᒪᑕ ᓇᐅᓕᒃᓯᒪᔪᐃᓐᓇᕐᓂᒃ ᐱᓇᓱᒃᐸᓚᐅᕐᒪᑕ

ᐃᓚᖏᑦ ᑲᐳᖅᓴᐃᑐᐃᓐᓇᖅᖢᑎᒃ ᐱᓱᖒᒐᒥᒃ, ᐃᓚᖏᑦ ᐊᖑᕕᒐᑦᑎᐊᒻᒪᕆᒃᖢᒍ

ᑐᖁᒡᕕᐊ ᐊᔪᕆᖅᓲᔾᔭᐅᓯᒪᒐᒥᒃ ᑕᐃᑰᓇ ᑐᖁᓴᕆᐊᖅᐸᒃᖢᒍ ᐱᕙᓚᐅᕐᒪᑕ

ᖁᑭᔾᔮᖏᓐᓇᒥᐅᒃ, ᖁᑭᐅᑎᖃᙱᒻᒪᑦ ᑕᐃᒪᓐᓇᐃᑦᑐᖃᖅᖢᓂᓕ

ᓴᒃᑯᒥᒃ ᑕᐃᓂᖃᖏᑦᑐᖅ ᐊᖑᕕᒐᐅᑦ, ᑕᐃᒪᓐᓇ ᑕᐃᓂᖃᑐᐃᓐᓇᖅᖢᓂ.

ᐅᓇ ᕿᔪᐊᕐᔪᖕᒥᒃ ᐱᖃᖅᑐᖅ, ᕿᔪᐊᕐᔪᖕᒥᒃ ᐱᖃᖅᖢᓂ ᑕᖕᓇ ᐅᓈᖓ

ᑖᓐᓇ ᐊᑦᑕᑕᖅᑕᑐᐃᓐᓇᕐᒪᑦ ᑕᐃᔅᓱᒧᖓ ᑕᒡᕙ ᒪᒃᑯᖕᓂᖅᓴᑎᒍᑦ

ᖃᐅᔨᒪᙱᔾᔪᑎᒋᓕᓚᐅᖅᑕᕗᑦ ᐊᖑᕕᒐᖅᑐᖃᕐᓂᐊᓕᕌᖓᒥ

ᑐᖅᖢᓚᔪᖃᕌᖓᑦ ᐊᒡᔭᑲᐅᖅᑐᕋᓱᒃᑲᓗᐊᖅᖢᑎᒍᑦ ᑕᒡᕙ ᐃᓐᓇᕆᔭᕗᑦ

ᐃᓐᓇᕆᔭᕗᑦ ᑕᐃᒪ ᐊᖑᕕᒐᕆᐊᕐᓂᐊᖅᑐᖅ. ᑕᐃᒪ ᑕᒡᕙ ᒪᒃᑯᖕᓂᖅᓴᑎᒍᑦ

ᐃᓕᑦᑎᔾᔪᑎᒋᓯᒪᓗᐊᓚᐅᙱᑕᕗᑦ ᑕᐅᑐᒃᐸᒃᑲᓗᐊᖅᖢᑕ

ᐃᓕᖅᑯᓯᖅᑕᕆᓚᐅᕐᒪᒍ ᑖᓐᓇ ᑐᖅᖢᓚᔪᖃᕐᒪᑦ ᑕᒡᕙ ᐊᒡᔭᖅᑕᐅᓪᓗᓂ

ᑕᐃᒪ ᐃᓐᓇᕆᔭᕗᑦ ᑕᐃᖕᓇ ᐊᖑᕕᒐᕆᐊᕐᓂᐊᖅᑐᖅ ᑐᖂᑦᑎᒋᐊᕐᓗᓂ

ᓂᕐᔪᑎᒥᒃ. ᑖᓐᓇ ᐃᓕᖅᑯᓯᖅᑕᕆᖅᑰᔨᓚᐅᕐᒥᖕᒪᒍ ᑕᐃᒪᙵᑦ

ᓄᑕᕋᐅᓂᑦᑎᓐᓂᑦ ᑕᐅᑐᒃᐸᒃᑲᓗᐊᖅᖢᑕ ᑕᐃᒪᓐᓇᐃᑦᑑᓚᐅᖅᑐᒍᑦ.