ᓇᑦᑎᕋᓲᑦ
ᑖᒃᑯᐊ ᐊᑐᖅᑕᐅᕙᒃᑐᑦ ᓇᑦᑎᕋᓱᒃᑐᓄᑦ ᐊᒡᓗᒃᑯᑦ.
ᓴᓇᕐᕈᑦ
ᐊᖑᓇᓱᒃᑎᑦ ᐊᑯᓂᐊᓗᒃ ᓂᒃᐸᖅᐸᓚᐅᖅᑐᑦ, ᐆᒥᖓ ᐊᑐᖅᖢᑎᒃ ᓇᒡᔪᖕᒥᑦ ᓴᓇᓯᒪᔪᒥᒃ. ᑲᑉᐳᑎᓯᒪᓪᓗᑎᒃ ᐊᐳᑎᒧᑦ, ᐃᒡᓗᐊᒍᑦ, ᖁᕝᕙᖅᑎᓯᒫᕐᔪᒃᑐᒥ, ᐅᓈᕐᒧᑦ ᐃᓂᒋᔭᐅᓪᓗᓂ. ᐊᒃᖢᓈᕐᒧᑦ ᓇᑦᑎᕐᒥᒃ ᐅᓂᐊᖅᓯᔪᓐᓇᖅᑐᑦ, ᐃᓄᖕᒧᑦ ᕿᒻᒥᓄᓪᓘᓐᓃᑦ ᐅᓂᐊᖅᑕᐅᓗᓂ. ᐃᓄᑐᖃᐃᑦ ᐊᖏᖃᑎᒌᒍᓐᓇᓚᐅᙱᑦᑐᑦ ᖃᓄᖅ ᐅᓇ ᐊᑐᖅᑕᐅᕙᖕᓂᕐᒪᖔᑦ, ᐊᑐᖅᑕᐅᕙᙱᑦᑐᑐᖃᐅᓗᐊᓕᖅᓯᒪᖕᒪᑦ.
ᐴᖅ
ᐊᒥᕐᒥᑦ ᐴᓕᐊᕆᓯᒪᔪᖅ ᐱᖓᓱᓂᒃ ᑑᒑᖃᖅᖢᓂ ᓴᐅᓂᕐᒥᒡᓗ ᒥᖅᑯᑎᖃᖅᖢᓂ ᐃᑭᓄᑦ ᒥᖅᓱᕈᑕᐅᕙᓚᐅᖅᑐᑦ ᐊᐅᓗᐊᕐᓂᐊᕐᓂᐊᙱᒻᒪᑦ ᐊᖑᑕᐅᓯᒪᔪᖅ ᐊᖏᕐᕋᒧᑦ ᑎᑭᐅᔾᔭᐅᓚᐅᙱᓐᓂᖓᓂ. ᐅᑭᐅᒃᑯᑦ, ᐳᑐᕿᑯᑎᑦ ᐃᑭᓂᒃ ᒥᖅᓱᕈᑕᐅᕙᓚᐅᖅᑐᑦ, ᖁᐊᖅᐸᓪᓕᐊᑲᐅᑎᒋᕙᒃᖢᑎᒃ. ᐊᐅᔭᒃᑯᑦ ᒥᖅᑯᑎ ᐃᑭᓂᒃ ᒥᖅᓱᕈᑕᐅᕙᓚᐅᖅᑐᖅ ᐃᕙᓗᖃᖅᖢᑎᒃ. ᒫᓐᓇᒃᑯᑦ, ᐃᒡᓗᓕᖕᒥ ᐊᖑᓇᓱᒃᑎᑦ ᓇᑦᑎᖅᑕᒥᖕᓂᒃ ᐋᒃᑐᖅᓯᑲᐅᑎᒋᕙᓕᖅᑐᑦ. ᐊᐅᖓ ᐊᑐᖅᑕᐅᕙᙱᓕᖅᑐᖅ.
