ᖃᕋᓴᐅᔭᒃᑯᑦ ᐃᓄᐃᑦ ᐃᓕᖅᑯᓯᖏᓐᓂᒃ ᓴᖅᑭᔮᖅᑎᑕᑦ ᐱᓕᕆᐊᖑᓚᐅᖅᐳᑦ ᐊᕐᕌᒍᓄᑦ ᑎᓴᒪᓄᑦ ᐃᒡᓗᓕᖕᒥ ᓚᕚᓪ ᓯᓚᑦᑐᖅᓴᕐᕕᒡᔪᐊᕐᒥᓪᓗ 50-ᖏᓐᓃᐸᓗᒃᑐᓂᒡᓗ ᓄᓇᓕᖕᒥᙶᖅᑐᓂᒃ ᑕᑯᔭᒐᖃᖅᖢᑎᒃ. ᑕᑯᔭᒐᑦ ᓄᐊᑕᐅᓚᐅᖅᓯᒪᔪᑦ 1960-ᖏᓐᓂ ᐱᕐᓈᒧᑦ, ᓚᕚᓪ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓴᐃᔨᐅᔪᒧᑦ. ᑲᑎᒪᔾᔪᑕᐅᖃᑦᑕᓚᐅᖅᑐᑦ ᐊᒥᓱᐊᖅᑎᖅᖢᑎᒃ ᐃᓕᖅᑯᓯᖃᑎᒌᙱᑦᑐᑦ ᐅᑭᐅᖃᖃᑎᒌᙱᑦᑐᓪᓗ ᑲᑎᖦᖢᑎᒃ, ᖃᕋᓴᐅᔭᒃᑯᑦ ᐃᓕᓐᓂᐊᖅᑎᑦᑎᔾᔪᑎᒃᓴᒥᒃ ᓴᖅᑭᑦᑎᔪᒪᓪᓗᑎᒃ. ᐆᒥᖓ ᑕᑯᔭᒐᖃᕐᕕᖕᒥᒃ ᓴᖅᑭᑦᑎᓕᓚᐅᖅᐳᑦ. ᑐᕌᖓᔪᖅ ᐃᓄᖕᓄᑦ ᒪᒃᑯᒃᑐᓄᑦ, ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑐᓄᑦ ᐃᓕᓴᐃᔨᓄᓪᓗ, ᑭᒃᑯᑐᐃᓐᓇᕐᓄᓪᓗ ᑕᑯᔪᒪᔪᓄᑦ. ᖃᐅᔨᒋᐊᖅᑐᑦ ᖃᐅᔨᔪᓐᓇᕐᓂᐊᖅᐳᑦᑐᖅ ᐃᓄᐃᑦ ᐃᓕᖅᑯᓯᖓᓐᓂᒃ ᑲᓇᑕᒥᐅᑕᐅᓪᓗᑎᒃ.
354-ᖑᓪᓗᑎᒃ ᓄᐊᑕᐅᓯᒪᔪᑦ ᓄᓇᕗᒻᒥᑦ ᓄᓇᕕᖕᒥᓪᓗ, ᐱᕐᓈᑉ ᓄᐊᓯᒪᔭᖏᑦ ᓴᖅᑭᑦᑎᓯᒪᕗᑦ ᐃᓅᓯᐅᕙᓚᐅᖅᓯᒪᔪᒥᒃ ᕿᓚᒥᒻᒪᕆᐊᓗᒡᓗ ᐊᓯᔾᔨᖅᐸᓪᓕᐊᓯᒪᔪᓂᒃ ᐃᓄᐃᑦ ᐃᓅᓯᖏᓐᓂ ᓄᓇᒥᐅᑕᐅᔪᓐᓃᖅᖢᑎᒃ ᓄᓇᓕᖕᒥᐅᑕᐅᕙᓕᓚᐅᕐᓂᖏᓐᓂᑦ. ᐃᓕᓐᓂᐊᕈᑎᒃᓴᒻᒪᕆᐅᕗᑦ ᖃᐅᑕᒫᑦ ᐊᑐᖅᑕᐅᕙᒃᑐᑦ ᓴᓇᙳᐊᖅᑎᓄᑦ ᓴᓇᙳᐊᖅᑕᐅᕙᓕᕐᒪᑕ. ᓚᕚᓪ ᓯᓚᑦᑐᖅᓴᕐᕕᒡᔪᐊᕐᒥ 2018-ᒥ ᓄᐊᑕᐅᓯᒪᔪᑦ ᓴᖅᑭᑕᐅᓚᐅᖅᑎᓪᓗᒋᑦ, ᐅᖃᓕᒫᒐᖃᕐᕕᓕᕆᔨᒃᑯᑦ ᐊᒻᒪ ᐃᓕᖅᑯᓯᖃᖃᑎᒋᙱᑦᑐᓕᕆᔨᒃᑯᑦ ᓴᖅᑭᔮᖅᑎᑦᑎᒃᑲᓐᓂᕈᒪᓕᓚᐅᕐᒪᑕ ᐃᓄᓕᒫᓄᑦ ᑕᑯᔭᒃᓴᓂᒃ. ᑕᑯᔭᒐᖃᕐᕕᓕᐅᓚᐅᖅᑐᑦ ᐃᓄᐃᑦ ᓄᓇᖓᓐᓂᒃ, ᒪᑐᐃᖅᑕᐅᓚᐅᖅᖢᓂ ᒫᑦᓯ 2019-ᖑᑎᓪᓗᒍ ᐅᖃᓕᒫᒐᖃᕐᕕᖓᓐᓂ. ᓴᖅᑭᔮᖅᑎᑕᐅᓚᐅᑲᑐᐃᓐᓇᕐᓂᖏᓐᓄᑦ, ᐃᖅᑲᓇᐃᔭᖅᑎᓪᓗ ᓯᓚᑦᑐᖅᓴᕐᕕᒡᔪᐊᒥ ᑲᒪᑦᑎᐊᕋᓱᒃᖢᑎᒃ ᓄᐊᑕᐅᓯᒪᔪᓂᒃ, ᑕᑯᔭᒐᖃᕐᕕᒃᑯᑦ ᐃᑭᐊᖅᑭᕕᒃᑯᑦ ᓴᖅᑭᔮᕐᓂᐊᖅᑐᓂᒃ ᓴᖅᑭᑦᑎᔪᒪᓕᓚᐅᖅᐳᑦ. ᐱᕐᓈ ᐃᒡᓗᓕᖕᒥᐅᓂᒃ ᖃᐅᔨᒪᔭᐅᑦᑎᐊᕐᓂᖓᓄᑦ, ᐊᒻᒪ ᐊᒥᓱᑦ ᓄᐊᓯᒪᔭᖏᑦ ᐃᒡᓗᓕᖕᒥᙶᕐᓂᖏᓐᓄᑦ (ᐊᕝᕙᖏᓐᓂᒃ ᐊᒥᓲᓂᖅᓴᑦ), ᖃᐅᔨᓴᖅᑎᑦ ᐃᒡᓗᓕᖕᒧᙵᐅᓚᐅᖅᐳᑦ ᐄᐳᕈ 2022-ᖑᑎᓪᓗᒍ ᖃᐅᔨᓇᓱᒋᐊᖅᖢᑎᒃ ᐱᓕᕆᐊᖃᖃᑎᒋᔪᓐᓇᕐᓂᐊᕐᒪᖔᔾᔪᒃ.
ᑲᑎᒪᖃᑦᑕᓕᓵᖅᑎᓪᓗᒋᑦ ᐃᒡᓗᓕᖕᒥᐅᕙᓚᐅᖅᑐᑦ. ᓄᓇᕗᑦ ᓯᓚᑦᑐᖅᓴᕐᕕᖕᒥ, ᐃᓕᓴᐃᔨᐅᖃᑕᐅᔪᖅ ᔮᒃ ᕼᐊᐅᓕ, ᐊᒻᒪ ᐃᓕᓐᓂᐊᕐᕕᐊᓗᒃᑯᑦ ᐱᓕᕆᐊᖃᖃᑕᐅᔪᒪᓕᓚᐅᖅᐳᑦ. ᑕᐃᒃᑯᓄᖓ, ᑕᑯᓪᓗᑎᒃ ᓄᐊᑕᐅᓯᒪᔪᕕᓂᕐᓂᒃ ᐊᑐᖅᑕᐅᕙᓚᐅᖅᓯᒪᔪᓂᒃ ᐃᓕᖅᑯᓯᑐᖃᕐᓂᒡᓗ ᑕᑯᒃᑲᓐᓂᕈᓐᓇᓕᓚᐅᖅᐳᑦ ᒪᒃᑯᒃᑐᓪᓗ ᐃᓄᑐᖃᕐᓂᒃ ᑐᓴᕐᕕᖃᒃᑲᓐᓂᕈᓐᓇᖁᓪᓗᒋᑦ. ᐃᓕᓐᓂᐊᕐᕕᒃᑯᑦ ᓄᓇᓕᖕᒥᐅᓪᓗ ᑲᑎᒪᑎᑦᑎᖃᑦᑕᓚᐅᖅᐳᑦ, ᒪᕐᕉᒃ ᐃᓄᑐᖄᒃ ᐃᒡᓗᓕᖕᒥᑦ ᑯᐸᐃᒃ ᓯᑎᓕᐊᖅᖢᑎᒃ ᕿᒥᕐᕈᔭᖅᑐᖅᖢᑎᒃ ᓄᐊᑕᐅᓯᒪᔪᓂᒃ ᖃᐅᔨᒪᔭᒥᖕᓂᒡᓗ ᐅᖃᐅᓯᖃᕆᐊᖅᑐᖅᖢᑎᒃ, ᔮᒃ ᐃᓚᐅᖏᓐᓇᖃᑦᑕᓚᐅᖅᑐᖅ. ᑲᑎᖦᖢᒋᑦ ᑕᓪᓕᒪᐃᖅᖢᑎᒃ ᐊᐅᓪᓚᖃᑦᑕᓚᐅᖅᑐᑦ ᐃᒡᓗᓕᖕᒥᑦ ᑯᐸᐃᒃ ᓯᑎᒥᓪᓗ 2022-2025 ᐊᖑᓐᓂᖓᓂ. ᑲᑎᒪᔭᕌᖓᒥᒃ ᖁᕕᐊᓇᖅᑐᐊᓘᕙᓚᐅᖅᑐᖅ ᑭᓲᓂᖏᓐᓂᒃ ᐃᓕᓐᓂᐊᖅᐸᓪᓕᐊᓪᓗᑎᒃ ᑭᓱᑦ ᐊᑐᖅᑕᐅᕙᓚᐅᖅᓯᒪᖕᒪᖔᑕ ᑭᓱᑦ ᓱᓕ ᐊᑐᖅᑕᐅᕙᖕᒪᖔᑕ. ᓂᐱᓕᐅᖅᑕᐅᓯᒪᔪᑦ ᑕᕐᕆᔭᐅᓯᐅᖅᑕᐅᓯᒪᔪᓪᓗ ᑲᑎᒪᔾᔪᑕᐅᓚᐅᖅᑐᓕᒫᓂᑦ ᐊᑑᑎᖃᒻᒪᕆᓚᐅᖅᐳᑦ ᓴᖅᑭᑕᐅᔪᒃᓴᓄᑦ, ᓄᓇᕗᑦ ᓯᓚᑦᑐᖅᓴᕐᕕᒃᑯᓐᓄᓪᓗ ᑐᓂᔭᐅᓪᓗᑎᒃ ᐃᓕᓐᓂᐊᖅᑎᑦᑎᔾᔪᑎᒃᓴᐅᔪᓐᓇᕐᓂᐊᕐᒪᑕ.
ᑕᒪᒃᑯᐊ ᑕᑯᔭᒃᓴᑦ ᑐᓴᒐᒃᓴᓪᓗ ᐃᓚᒋᔭᐅᕗᑦ ᐊᖏᓂᖅᓴᒻᒪᕆᖕᒧᑦ, ᐃᒡᓗᓕᖕᒥᐅᑦ ᓴᓇᑐᓂᖏᓐᓂᒃ ᐃᓱᒪᑐᓂᖏᓐᓂᒡᓗ ᐃᒃᐱᒍᓱᑦᑎᐊᕋᓱᒃᖢᑎᒃ. ᖁᔭᒋᑦᑎᐊᕈᒪᕙᕗᑦ ᐊᕐᕌᒍᓂ ᐃᑲᔪᕐᓂᖃᖃᑦᑕᓚᐅᖅᑐᑦ ᑕᒪᑐᒥᖓ ᐋᖅᑭᒃᓱᐃᑎᓪᓗᒋᑦ ᐃᑭᐊᖅᑭᕕᒃᑯᑦ ᑕᑯᔭᒐᖃᕐᕕᖕᒥᒃ. ᖁᔭᒋᔭᐃᓐᓇᕆᕙᕗᑦ ᐱᓕᕆᐊᖃᖃᑎᒋᓚᐅᖅᑕᕗᑦ ᐊᒥᓱᓪᓗ, ᐱᓗᐊᖅᑐᒥᒃ ᒋᐅᒻ ᓴᓚᑎᓐ (ᐊᒃᓯᒃᑯᓐᓂᑦ), ᓕᐅᓪᕕ ᓚᐸᓚᒃ (ᐃᓕᖅᑯᓯᓕᕆᔨᒃᑯᓐᓂᑦ ᓄᓇᕗᑦ ᒐᕙᒪᖓᓐᓂᑦ), ᐃᓕᓴᐱ ᐊᕙ, ᐊᒻᒪ ᒥᐊᓕ ᑯᓄᒃ (ᐃᓕᓴᐃᔩᒃ ᐃᓕᓐᓂᐊᕐᕕᐊᓗᖕᒥ ᐃᒡᓗᓕᖕᒥ).
