Natalino Piugattuk: ᓇᑕᓕᓅ ᐱᐅᒑᑦᑑᔪᖓ ᐃᒡᓗᓕᖕᒥᐅᑕᐅᓪᓗᖓ, ᖃᖓᑦᑎᐊᕈᓗᒃ
ᐃᓅᓂᑯᕕᓂᐅᒐᓗᐊᖅᑐᖓ ᐃᓛᒃ ᐃᒻᒪᑲᓪᓛᕐᔫᓕᕆᓪᓗᓂ 1948 [ᖅᑲᓪᓗᓈᑎᑐᑦ] .
ᐃᓅᓚᐅᖅᓯᒪᒐᒪ September 18 [ᖅᑲᓪᓗᓈᑎᑐᑦ]. ᑕᐃᒪᙵᑦ ᑕᒡᕙ ᐃᓅᕈᓘᔭᖅᓯᒪᒐᒪ
74 [ᖅᑲᓪᓗᓈᑎᑐᑦ]-ᓂᒃ ᐅᑭᐅᖄᓗᓕᕋᓗᐊᖅᖢᖓ, ᐃᓄᒃᑎᑐᑦ ᖃᐅᔨᒪᒻᒪᕆᙱᒃᑲᓗᐊᖅᖢᖓ
ᐃᓚᖓᒍᑦ ᖃᐅᔨᒪᒐᓛᒃᑐᕈᓘᓪᓗᖓ ᑕᐃᒪᓐᓇᐃᑦᑑᒐᒪ. ᑭᓱᑦ ᑕᒪᒃᑯᐊ
ᐃᓄᒃᓯᐅᑎᕈᔪᐃᓪᓕ ᐃᓚᖏᑦ ᐊᑎᖏᑦ ᐳᐃᒍᐊᓕᖅᖢᒋᑦ.
ᑕᒡᕙ ᕿᒻᒥᐅᑉ ᐊᓄᐊᓂᒃ ᐅᖃᐅᓯᖃᕐᓂᐊᕋᒪ, ᑕᐃᒪ ᑕᑯᔭᐅᔭᕌᖓᒥ
ᕿᒻᒥᐅᑉ ᐊᓄᐊ ᑕᐃᒪᓐᓇᑐᐃᓐᓇᖅ ᐃᓱᒪᒋᔭᐅᖕᒪᑦ.
ᑕᒪᒃᑯᐊ ᐊᑎᕈᔪᖏᑦ ᓲᕐᓗ ᑕᒡᕙ ᐅᓇ ᐊᓅᒐᒥ ᐅᕐᖑᐊᖃᖅᖢᓂ.
ᑖᓐᓇ ᐅᕐᖑᐊᕆᓪᓗᓂᐅᒃ. ᓴᑭᐊᒍᑎᖃᖅᖢᓂᓗ [ᓇᑕᓕᓅ ᕿᒥᕐᕈᕗᖅ ᐊᓄᒥᒃ ᑐᓄᖅᐸᓯᐊᓃᖖᒑᖅᑐᒥᑦ ᓯᕗᓂᐊᓄᑦ].
ᑕᒡᕗᖓ ᓈᒻᒪᒃᓯᓕᖅᓯᒪᑦᑎᐊᕋᓱᖕᒥᖕᒪᑦ [ᓇᑕᓕᓅᑦ ᑎᒃᑯᐊᖅᐳᖅ ᐊᓅᑉ ᑐᓂᖅᐸᓯᐊᒍᑦ ᓇᐃᑦᑐᒥᒃ ᐊᒃᑐᓈᖕᒐᓄᑦ ᐊᒻᒪᓗ ᑕᖅᑭᖖᒍᐊᖕᒍᔮᖅᑐᖅ ᐊᕝᕙᖕᒐᓂ ᐊᑕᓪᓗᓂ ᐃᓱᐊᒍᑦ], ᑕᓯᒎᑎᖃᖅᖢᓂ
ᑕᓯᒎᑎᖃᕋᒥᓗ ᓴᓐᓂᕉᔭᖃᕆᓪᓗᓂ. ᓇᒡᔪᖕᒥᒃ ᑖᓐᓇ ᓴᓐᓂᕉᔭᖃᖅᖢᓂ
ᑕᒡᕙ ᑖᓐᓇ ᐊᓄ ᓴᓇᓯᒪᔪᖅ ᐅᒡᔫᑉ ᕿᓯᐊᓂᒃ. ᐅᒡᔫᑉ ᕿᓯᐊᓂᒃ ᓴᓇᓯᒪᔪᖅ.
ᐊᓄᒥᒃ ᑕᐃᔭᕗᑦ ᑕᒪᕐᒥᓕᒫᕌᓗᒃ ᐊᓅᓂᕋᖅᖢᑎᒍ ᐊᑎᖃᐅᕋᓗᐊᖅᑎᓪᓗᒍ
ᐅᕐᖑᐊᖃᖦᖤᕋᒥ, ᓴᑭᐊᒍᑎᖃᖦᖤᕋᒥ, ᐋᕆᐊᒍᑎᖃᖦᖤᕋᒥ, ᑕᒪᒃᑯ ᐊᑎᕆᕈᓘᔭᖅᓗᓂᒋᑦ
ᑕᐃᒪᓐᓇᐃᑦᑑᔫᒐᓗᐊᖅ. ᖃᖓᓕᒫᖅ ᐊᑐᔾᔮᔪᓐᓃᖅᑐᖅ ᕿᓯᒃ ᑖᓐᓇ
ᖃᓪᓗᓈᖅᑕᐃᓐᓇᕐᓂᒃ ᒫᓐᓇᒃᑯᑦ ᐊᑐᖃᑦᑕᓕᕋᑦᑕ. ᑕᒡᕙ ᑭᖑᓪᓕᖅᐹᐸᓘᔪᒃᓴᐅᓕᖅᖢᓂ,
ᐃᓛᒃ ᐱᖃᐅᕋᓗᐊᖅᑐᖓ ᓱᓕ ᓄᓇᑦᑎᓐᓂ, ᑖᓐᓇᓕ ᑕᒫᓂ ᐃᓄᐃᑦ
ᓴᓇᖃᑦᑕᖅᑕᖏᓐᓂᑦ ᑕᐃᒪᓐᓇ ᑕᑯᒐᔪᓗᐊᕈᓐᓃᖅᑐᒍᑦ. ᑕᒡᕙ ᑖᓐᓇ
ᐅᖃᐅᓯᒃᓴᑐᐊᕐᓚᑯᓗᒋᒐᒃᑯ ᐊᓄᕐᓚᓐᓇᔪᒃ ᐊᑎᖃᕐᓂᖓᓂᒃ ᑕᑯᔭᐅᑐᐃᓐᓇᖅᖢᓂ
ᖃᐅᔨᒪᔭᐅᔪᖅ ᑭᓲᔭᕆᐊᒃᓴᖓᓂᒃ ᑭᒃᑯᓕᒫᓂᑦ. ᐃᓄᖕᓂᓪᓕ ᑕᐃᒃᑯᓇᙵᑦ
ᐊᑐᖃᑦᑕᖅᑐᓂᑦ. ᐊᑐᖃᑦᑕᙱᑦᑐᓂᑦ ᖃᐅᔨᒪᔭᐅᙱᒃᑲᓗᐊᖅᖢᓂ
ᑕᐃᒪᓐᓇᐃᑦᑑᖦᖤᖅᐳᖅ ᑕᒡᕙ. ᖁᔭᓐᓇᒦᒃ.
