ᑑᒃᑲᖅ ᐊᓕᕐᓗ
ᑑᒃᑲᖅ ᐊᑕᓪᓗᓂ ᐅᓈᕐᒧᑦ ᐊᖏᔪᓂᒃ ᐆᒪᔪᕐᓂᐊᕋᓱᐊᕈᑕᖅ. ᐊᑦᑕᑕᐃᕋᔭᖅᖢᓂ ᓇᐅᓕᒃᓯᒍᓂ. ᐊᖑᓇᓱᒃᑎ ᓄᓱᒃᓯᒍᓂ ᐊᓕᕐᒥᒃ, ᑑᒃᑲᖅ ᓴᓐᓂᕐᓗᓂ ᐊᑦᑕᑕᕋᔭᖅᑐᖅ ᐆᒪᔪᕐᒧᑦ. ᑐᖁᑕᐅᓕᖅᖢᓂᓗ.
ᓴᕕᓕᐊᖅ
ᑑᒃᑲᐅᑉ ᑮᓇᖓ, ᑕᐃᔭᐅᔪᖅ ᓴᕕᓕᐊᕐᒥᒃ, ᐊᔾᔨᒌᙱᑦᑐᓂᒃ ᑮᓐᓇᒃᓴᖅᑕᐅᕙᓚᐅᖅᑐᖅ ᐊᔾᔨᒌᙱᑦᑐᓄᑦ ᐊᖑᑕᒃᓴᓄᑦ. ᐊᐃᕕᕐᓄᑦ, ᐃᓚᖏᑦ ᐃᓄᑐᖃᐃᑦ ᐅᖃᖅᐸᓚᐅᖅᑐᑦ ᐃᐱᑦᑎᐊᖅᑐᓂᒃ ᓴᕕᓕᐊᖃᕆᐊᖃᖅᐸᓚᐅᕐᓂᖏᓐᓂᒃ ᕿᓯᖏᑦ ᐃᔾᔪᔪᐊᓘᓂᖏᓐᓄᑦ. ᕿᓚᓗᒐᕋᓱᒍᑕᐅᒃᐸᑦ, ᓴᕕᓕᐊᖓ ᐃᐱᙱᓐᓂᖅᓴᐅᓪᓗᓂ ᕿᓚᓗᒐᐅᑉ ᕿᓯᖓ ᐊᕿᓐᓂᖅᓴᐅᖕᒪᑦ.
ᐊᓕᖅ
ᐊᓕᖅ ᓯᓕᒃᖢᓂ ᐊᕙᑕᕐᒧᑦ ᐊᑕᒐᒥ, ᐊᖑᓇᓱᒃᑎᐅᓪᓗ ᑎᒍᒥᐊᕐᕕᒋᓪᓗᓂᐅᒃ, ᐊᒧᓯᔾᔪᑎᒋᓪᓗᓂᐅᒃ, ᐅᓂᐊᖅᓯᔾᔪᑎᒋᓪᓗᓂᐅᒡᓗ ᐊᖑᑕᒥᒃ. ᐅᒡᔪᕋᔭᖕᒥᑦ ᓴᓇᓯᒪᕙᓚᐅᖅᑐᖅ ᕿᑐᓕᓴᖅᑕᐅᒐᔪᒃᖢᓂᓗ ᐸᓂᕐᓂᐊᙱᒻᒪᑦ ᓱᕋᒃᐸᓪᓕᐊᓂᐊᙱᒻᒪᓪᓗ. ᐊᒻᒪ, ᐊᓕᖅ ᓯᓕᖕᓂᖅᓴᐅᔭᕆᐊᖃᖅᖢᓂ ᕿᕋᑕᓗᐊᙱᓪᓗᓂ ᕿᓚᖕᓂᖃᓕᕐᓂᐊᙱᒻᒪᑦ ᐊᒻᒪ ᐊᖑᓇᓱᒃᑎᒧᑦ ᐊᑦᑕᕐᓇᓕᕐᓂᐊᙱᒻᒪᑦ ᓇᐅᓕᒃᑕᐅᓯᒪᔪᒥᒃ ᐊᒧᓯᓇᓱᓕᖅᑎᓪᓗᒋᑦ.
ᒫᓐᓇ, ᐊᔾᔨᐸᓗᖏᓐᓂᒃ ᑑᒃᑲᓕᐅᖅᐸᒃᑐᑦ, ᑭᓯᐊᓂ ᓴᕕᕋᔭᖕᓂᒃ ᓴᓇᓯᒪᕙᓕᖅᑐᑦ. ᐊᒻᒪ, ᐊᖑᓇᓱᒃᑎᑦ ᐊᒃᖢᓇᐅᔭᕐᓂᒃ ᓂᐅᕕᖅᐸᓕᖅᑐᑦ, ᐊᒃᖢᓈᕐᓂᒃ ᓴᓇᕙᒍᓐᓃᖅᑐᑦ.
