Natalino Piugattuk: Taanna sakkutut aaqqiksimaqquujijuugaluaq atiqaqtuq Anguvigaut.
Anguvigautituinnaq taanna. Una anguvigarutaugami kiinanga
kiinanga piuquluamut taanna tagvunga ilijausimainnaujaqłuni
atuqtaunialiraangami kisiani piiqtauvakłuni. Taanna unaaqaqłuni
ipiutaqaqłuni, unaaqaqłuni nirjutinut angijuutiugaluanut
tamakkununga aivirnut, qilalukkanut nauliksimajunut
atuqtaujuq tigutuinnariaqanngittunut. Taikkua tamaunatuinnattauq
kisiani taassumunga anguvigaqtausuungunngimmat taqtuanga naliqqugiaqpakługu
tagva taikkua taassumunga atuqtut, atuqtuq tainna
tagva pigiarami nirjutimut aivirmulluunniit qilalukkamulluunniit.
Aittaalalluni, uvaguugunili nauliksijuannuugami alianaigusukkajaqłuni
taikkuali taassumunga anguvigariaqtut taimanngalimaanguqquujijuq
pigiarami aittaalalluni. Tagva tuqusattiarniaqtaalua.
Alianaigusuujarulukkuni saniqqułłarniarmagu aittaarusuqquujilluni.
Una sakkuungittiaqtuq. Tagva pinirlukkaluaruni tuqusanngikkaluaruniuk
nusutuinnarluniuk naktigviqajaanngimmat tuqusangikkuniuk tagvaksatuangungmat
qukiutiqannginnami taanna nusutuinnarniarmagu tuqunngippat taingna.
Ilaak nusuktainnaqtaraluanga taikanngat anguvigariaqłuniuk.
Aittaalaujaqpuq tagva pigiattiaraalukkaluarniruniluunniit
pigiattiangikkuniluunniit pigiattiarniarasuginngituinnaqłuni
aittaalajuq. Taingna anguvigarasuktuq taassumunga tuquuttinasuktuq
taimanna iliqqusiqtaqaqquujilauqtuq tagva qaujilaurakkut taanna
anguvigaq. Uvangali nangminiq atausiaraluaqłunga savingmut
aivirmik anguvigaqsigianngualauqsimagivunga tuqusalluaqtakulugilauqsimagakku
pikkulilauqsimagivunga. Taanna atuqtauvigjuaqtualuulauqtuq kikkulimaanit
qukiutiqaqpalaungimmata nauliksimajuinnarnik pinasukpalaurmata
ilangit kapuqsaituinnaqłutik pisunnguugamik, ilangit anguvigattiammarikługu
tuqugvia ajuriqsuujjausimagamik taikuuna tuqusariaqpakługu pivalaurmata
qukijjaanginnamiuk, qukiutiqanngimmat taimannaittuqaqłunili
sakkumik tainiqangittuq Anguvigaut, taimanna tainiqatuinnaqłuni.
Una qijuarjungmik piqaqtuq, qijuarjungmik piqaqłuni tangna unaanga
taanna attataqtatuinnarmat taissumunga tagva makkungniqsatigut
qaujimanngijjutigililauqtavut anguvigaqtuqarnialiraangami
tuqłulajuqaraangat agjakauqturasukkaluaqłutigut tagva innarijavut
innarijavut taima anguvigariarniaqtuq. Taima tagva makkungniqsatigut
ilittijjutigisimalualaunngitavut tautukpakkaluaqłuta
iliqqusiqtarilaurmagu taanna tuqłulajuqarmat tagva agjaqtaulluni
taima innarijavut taingna anguvigariarniaqtuq tuquuttigiarluni
nirjutimik. Taanna iliqqusiqtariqquujilaurmingmagu taimanngat
nutaraunittinnit tautukpakkaluaqłuta taimannaittuulauqtugut.