Natalino Piugattuk: Natalinuu Piugaattuujunga Iglulingmiutaullunga, qangattiaruluk
inuunikuviniugaluaqtunga ilaak immakallaarjuulirilluni 1948 [Qallunaatitut].
Inuulauqsimagama September 18 [Qallunaatitut]. Taimanngat tagva inuuruluujaqsimagama
74 [Qallunaatitut]-nik ukiuqaaluliraluaqłunga, Inuktitut qaujimammarinngikkaluaqłunga
ilangagut qaujimagalaakturuluullunga taimannaittuugama. Kisut tamakkua
Inuksiutirujuilli ilangit atingit puigualiqługit.
Tagva Qimmiup Anuanik uqausiqarniarama, taima takujaujaraangami
Qimmiup Anua taimannatuinnaq isumagijaungmat.
Tamakkua atirujungit suurlu tagva una anuugami Urnguaqaqłuni.
Taanna urnguarilluniuk. Sakiagutiqaqłunilu
tagvunga naammaksiliqsimattiarasungmingmat Tasiguutiqaqłuni
Tasiguutiqaramilu Sanniruujaqarilluni. Nagjungmik taanna Sanniruujaqaqłuni
tagva taanna anu sanasimajuq ugjuup qisianik. Ugjuup qisianik sanasimajuq.
Anumik taijavut tamarmilimaaraaluk anuuniraqłutigu atiqauraluaqtillugu
Urnguaqałłarami, Sakiagutiqałłarami, Aariagutiqałłarami, tamakku atiriruluujaqlunigit
taimannaittuujuugaluaq. Qangalimaaq atujjaajunniiqtuq qisik taanna
qallunaaqtainnarnik maannakkut atuqattaliratta. Tagva kingulliqpaapaluujuksauliqłuni,
ilaak piqauraluaqtunga suli nunattinni, taannali tamaani Inuit
sanaqattaqtanginnit taimanna takugajuluarunniiqtugut. Tagva taanna
uqausiksatuarlakulugigakku anurlannajuk atiqarninganik takujautuinnaqłuni
qaujimajaujuq kisuujariaksanganik kikkulimaanit. Inungnilli taikkunanngat
atuqattaqtunit. Atuqattanngittunit qaujimajaunngikkaluaqłuni
taimannaittuułłaqpuq tagva. Qujannamiik.