Natalino Piugattuk: Natalinuu Piugaattuk Iglulingmiutaq. Tamakkua Avatait.
Ilaak sakkut angunasuutauvakłuni uqallaarjungniarama
qaujimaarjuktakulunnik. Suurlu tagva aliqarami tuukkaqaqłuni
qilalugarniut, arvirniut. Taanna sakkuqaqtuksajaunnirami
napittaqtumik. Napittaqtuuniraqtauvuq taanna attatarami
taannalu kausisimatuinnarmat taissumunga qijuarjungmut.
Qijuarjuqaqłuni taanna taimannaittuungmat qijuarjuqangikkuni
mauna akłunaaqarajaqłuni. Qijuarjuqaqtuksajaugami
taanna sakkuk tuukkaulluni. Arvirniut, qilalugarniut.
Taanna taimannaittuulluni. Tagvanngat piliriarmigami
taanna avataq, avataq taanna tagvunga kautiłługu taanna.
Pullarittiarami taliruqaqłunilu. Taakkualu talirungik
iluagut nukiqarmata, nikiqaurmata taikkua nukikulungit
tagva tautungikkaluaqługit taqqamunga iluanut
taima nukikulungit kipijauttailimajut taikkuattauq
taassuminga puktalaarninganik ikajurmata.
Tautunngitavut tagva iliqqusiqtaringmingmaguttauq taanna
taimanna nukikulungit taikkua suurlu miqquijaaniksimanngilaq
angmarumanngiluamut. Taikkualu nukikulungit suragumanngiluamut.
Taassuma avatakuluup. Taima kukingit taakkua nakatirjuumisuungugaluat
taima taakkua nukingit ikajurmata tagva puktalaatuinnaqpuq
tamaani imaani. Atangmat taingna uniaqtaugami
ikajurmata nukikulungit taima tautunngitavut.
Ajautaqaqłuni arvirmuuqpat, arvirmuuruni ajautaq taanna
anginiqsaulluni. Taanna putukulua takuranniqtualuk
imaani ingirralluni taanna qaulluqtumik supivallianginnarmat
sukkaliluarnikumut. Ilaak sukkaippaallirutia taakkuak marruuk
ikajuqtigiikkamik sukkaijjutigilluniuk. Takuksaungmat tainnakuluk
tamaanngat pivalliajuq. Una qummugumangmat taanna takanani nirjutia
attikkaluaqtillugu taassuma tappaaniilaangujammigami ikajurmagu
qaulluqtumik taima pivalliagami takurannirutigilluniuglu
qaujimannarutigilluniuglu namunngaujariaksanganik taanna.
Taanna mikinniqsakuluugami arvingmut atuqtaungittuq.
Qilalukkamungaaq atuqtaujuq. Qajarmuurami ikumaliktunnginnami
sukkaitturuluugami, taimannaittuujuq tamakkua avalungit taassuma
una qisiungmat, nattiup qisirilluniuk. Una arviup suqqanganik
sanasimajuq suraksarainngittukuluk. Putuqanngittaraangamik qikturautijammata
makua qikturaajammata una putuqanngittaraangat. Taannalu putua
ingirrajumut takuksaujjutaulluni namunngaujariaksanganik taingna
ingirrajuq.