ᖁᓪᓗᖅ ᐊᓪᓕᕐᓗ
ᖁᓪᓕᖅ, ᐊᑐᖅᑕᐅᒻᒪᕆᓚᐅᖅᓯᒪᕗᖅ ᖃᐅᑕᒫᑦ. ᐊᖑᑎᓄᑦ ᓴᓇᔭᐅᓪᓗᑎᒃ, ᐊᕐᓇᓄᑦ ᑲᒪᒋᔭᐅᕙᒃᖢᑎᒃ.
ᐅᒃᑯᓯᒃᓴᕐᒥᑦ ᓴᓇᔭᐅᓯᒪᓂᖅᓴᐅᒐᔪᒃᖢᑎᒃ, ᐊᓂᐊᖓᔪᑦ ᑕᖅᑭᖅᑐᑦ ᐊᖏᓕᕇᒃᑐᓂᒃ ᓴᓇᔭᐅᕙᒃᖢᑎᒃ. ᐊᖏᓂᖅᓴᑦ ᐅᖅᑰᓴᕈᑕᐅᓪᓗᑎᒃ, ᖃᐅᒪᔾᔪᑕᐅᓪᓗᑎᒃ, ᓂᖅᖠᐅᕈᑕᐅᓪᓗᑎᒃ, ᐸᓂᖅᓰᔾᔪᑕᐅᓪᓗᑎᒡᓗ ᓂᕿᓂᒃ ᐊᓐᓄᕌᓂᒡᓗ. ᒥᑭᓐᓂᖅᓴᑦ, ᐊᓪᓕᕐᒥᒃ ᑕᐃᔭᐅᔪᑦ, ᑲᑕᖕᒥ ᖃᐅᒪᔾᔪᑕᐅᓪᓗᑎᒃ ᐊᐅᓪᓚᖅᓯᒪᑯᑖᖕᓂᐊᖅᑐᓄᓪᓗ ᓇᒃᓴᖅᑕᐅᕙᒃᖢᑎᒃ. ᒥᑭᓐᓂᖅᓴᐃᑦ ᐊᓪᓖᑦ ᐊᖑᓇᓱᒃᑎᓄᑦ ᐊᑐᖅᑕᐅᕙᓚᐅᖅᑐᑦ. ᖁᓕᑦᑕᒥ ᐃᓗᐊᒍᑦ ᓇᒃᓴᖅᓯᒪᓪᓗᒍ ᐅᖅᑰᔾᔪᑎᒋᓪᓗᒍᓗ ᐊᒡᓗᓂ ᐊᑯᓂᐊᓗᒃ ᓂᒃᐸᖅᑎᓪᓗᒋᑦ.
ᐅᖅᓱᖃᖅᐸᓚᐅᖅᑐᑦ ᐳᐃᔨᓂᑦ, ᐃᖕᓇᐅᑖ ᖁᓪᓕᕐᒧᑦ ᑯᕕᔭᒃᓴᐅᓪᓗᓂ. ᖁᓪᓕᐅᑉ ᑭᒡᓕᐊᓂ ᑲᖒᔭᖅ ᐅᖅᓱᕐᒧᑦ ᒥᓱᒃᓯᒪᔪᖅ. ᐃᑭᓯᒪᓕᖅᐸᑦ, ᐃᐸᕋᖓᑕ ᑕᑭᑎᒋᓂᖓᑐᑦ ᐃᑯᒪᔪᓐᓇᖅᐸᓚᐅᖅᑐᑦ. ᐊᕐᓇᐅᑉ ᐃᑯᒪᖓ ᑲᒪᒋᕙᒃᖢᓂᐅᒃ ᑕᖅᑯᑎᒧᑦ. ᒥᑭᓐᓂᖅᓴᐃᑦ ᑕᖅᑯᑎᑦ ᐊᑐᖅᑕᐅᕙᓚᐅᖅᑐᑦ ᐊᖑᓇᓱᒃᑐᓄᑦ ᐊᓪᓕᕐᒥᒃ ᖁᓕᑦᑕᕐᒥᐅᑕᖃᖅᑐᓄᑦ.
ᓱᓕ ᐅᓪᓗᒥ, ᖁᓪᓖᑦ ᐊᑐᖅᑕᐅᕙᒃᑐᑦ ᖃᐅᒪᔾᔪᑕᐅᓪᓗᑎᒃ ᐅᖅᑰᔾᔪᑕᐅᓪᓗᑎᒡᓗ ᐃᒡᓗᕋᓛᓂ ᐊᐅᓪᓛᖅᓯᒪᔪᓂᓗ, ᐊᖏᕐᕋᓂᓪᓗ ᖃᒥᔾᔪᔾᔨᓐᓂᕌᖓᒥᒃ, ᐊᐅᓪᓚᖅᑐᓄᑦ, ᐊᒻᒪ ᖁᕕᐊᓲᑎᖃᖅᑐᓄᑦ. ᓵᑦᑑᔭᐅᑎᕕᓂᕐᓂᑦ ᓴᓇᔭᐅᓯᒪᕙᓕᖅᑐᑦ, ᓵᑦᑑᔭᐅᑦ ᖁᓪᓕᖅᑐᑦ ᐋᖅᑭᒃᖢᒍ. ᓂᐅᕕᐊᓂᒃ ᐅᖅᓱᖃᖅᐸᓕᖅᑐᑦ. ᒫᓐᓇ, ᐊᖑᓇᓱᒃᑎᑦ ᐊᓪᓕᕐᓂᒃ ᐊᑐᖅᐸᒍᓐᓃᖅᑐᑦ ᓂᒃᐸᕐᓂᕐᒥᖕᓂ. ᓂᒃᐸᑯᑖᖃᑦᑕᙱᓐᓂᖅᓴᐅᓕᕐᒪᑕ ᐊᖑᓇᓱᖕᓂᕐᒧᑦ ᐊᑑᑎᒃᓴᖃᕐᓂᖅᓴᐅᓕᕐᓂᖏᓐᓄᑦ.
