ᐊᖅᓴᑦ ᐊᔪᒃᑕᕐᒧᑦ
ᑐᒃᑐᑉ ᓯᕝᕕᐊᖏᑕ ᓴᐅᓂᖏᑦ (ᐊᖅᓴᖓ) ᐊᖅᓴᕆᔭᐅᕙᓚᐅᖅᑐᑦ ᐊᔪᒃᑕᖅᑐᓂᒃ. ᓴᓇᓯᒪᔪᓐᓇᕆᓪᓗᑎᒃ ᐊᐃᕕᑦ ᖃᖁᓛᖏᓐᓂᑦ. ᓄᑲᑉᐱᐊᓄᑦ ᐱᙳᐊᖅᑕᐅᓪᓗᐊᑕᖅᐸᓚᐅᖅᑐᖅ, ᓂᕕᐊᖅᓵᖅ ᐊᕐᓇᓪᓗ ᐱᙳᐊᖃᑕᐅᔪᓐᓇᖅᐸᒃᑲᓗᐊᕆᓪᓗᖏᒃ.
ᐊᔭᒃᑕᖅᐸᓚᐅᖅᑐᑦ ᒪᕐᕈᐃᓕᖓᓪᓗᑎᒃ: ᐅᑭᐅᒃᑯᑦ ᐃᓅᓯᒪᔪᑦ ᐊᕿᒡᒌᑦ, ᐊᐅᔭᒃᑯᓪᓗ ᐃᓅᓯᒪᔪᑦ ᐊᒡᒋᐊᕐᔪᐃᑦ. ᐱᙳᐊᖅᑐᑦ ᓇᐃᑦᑐᒥᒃ ᑏᒐᕈᑎᖃᖅᖢᑎᒃ, ᐊᐃᕕᐅᑉ ᑲᐅᖓᓂᑦ, ᑎᒍᒥᐊᖅᖢᒍ ᐊᖅᓴᕐᒥᒡᓗ ᑏᒐᖅᓯᔾᔪᑎᒋᒋᐊᖅᖢᒍ. ᐊᒡᒋᐊᕐᔪᐃᑦ ᐊᖅᓴᕐᒥᒃ ᓯᑯᒧᑦ ᐃᒪᕐᒧᐊᖅᓯᓇᓱᒃᖢᑎᒃ, ᐊᕿᒡᒌᑦ ᓄᓇᒧᐊᖅᓯᓇᓱᒃᑎᓪᓗᒋᑦ.
ᐊᔪᒃᑕᒐᔪᓗᐊᕈᓐᓃᖅᑐᑦ. ᐃᓚᖏᑦ ᐅᖃᖅᓯᒪᔪᑦ, ᐱᙳᐊᖅᑕᐅᒐᔪᓚᐅᕐᓂᖓᓂᒃ ᐃᒻᒪᑦᑎᐊᕐᒧᑦ, ᕼᐋᑭᕈᑎᓂᒃ ᐊᖅᓴᕋᓛᓂᒡᓗ ᐊᑐᖔᓕᖅᖢᑎᒃ. ᒫᓐᓇᒃᑯᑦ, ᕼᐋᑭᕐᓂᖅ ᖁᕕᐊᒋᔭᐅᓂᖅᐸᐅᕙᓕᖅᑐᖅ ᒪᒃᑯᒃᑐᓄᑦ. ᐃᓚᖏᓐᓄᑦ ᐃᓄᑐᖃᕐᓄᑦ ᐅᖃᐅᓯᐅᕙᒃᑐᖅ ᐊᔪᒃᑕᖅᑰᔨᓂᖓᓂᒃ.
