ᐊᑎᒋ
ᑖᒃᑯᐊᒃ ᐊᑎᒌᒃ ᐊᑐᖅᑕᐅᕙᓚᐅᖅᑑᒃ ᒥᖅᑯᖓ ᐃᓗᐊᓃᖦᖢᓂ ᐊᒻᒪ ᐃᔾᔪᓂᖅᓴᖅ ᒥᖅᑯᖓ ᓯᓚᓪᓕᐅᓪᓗᓂ. ᐃᓗᓪᓕᕆᔭᐅᓪᓗᓂ ᐊᑎᒋ ᐊᕐᕌᒍᓕᒫᖅ ᐊᖑᑎᓄᑦ ᐊᑐᖅᑕᐅᕙᓚᐅᖅᑐᖅ. ᐊᐅᔭᒃᑯᑦ, ᑖᓐᓇᑐᐊᖅ ᐊᑐᖅᑕᐅᓪᓗᓂ, ᐅᑭᐅᒃᑯᑦ ᖁᓕᑦᑕᕐᒥᒃ ᖄᖃᖅᖢᓂ ᓯᓚᑖᒍᑦ ᒥᖅᑯᖃᖅᖢᓂ. ᐊᐃᕈᓯᖅᓯᒪᓪᓗᑎᒃ ᑐᒃᑑᑉ ᖁᖓᓯᖓᓐᓂᙶᖅᑐᓂᒃ. ᓂᒡᔭᑦ ᓱᕕᔾᔭᐃᒃᑯᑕᐅᓚᐅᖅᑐᑦ.
ᕿᖅᐸᐅᔮᖅᑐᖅ ᐊᑎᒋ
ᐊᑎᒋ ᐊᑲᐅᔪᒻᒪᕆᐊᓗᒃ ᐊᖑᓇᓱᒃᑎᓄᑦ, ᐃᖃᕐᓇᙱᑦᑎᐊᖅᖢᓂ ᓴᓂᕋᖏᒃᑎᒍᑦ ᓰᒃᓯᒪᒐᒥ. ᑕᐃᒪᐃᑦᑐᑦ ᐊᑎᒋᑦ ᑕᐃᔭᐅᔪᑦ ᕿᖅᐸᐅᔮᖅᑐᒥᒃ ᐊᑎᒋᒥᒃ, ᓴᓂᕋᖏᒃᑎᒍᒃ ᓰᒃᓯᒪᓂᖓᓄᑦ.
ᐊᑯᑐᐃᓐᓇᖅ ᐊᑎᒋ
ᑖᓐᓇ ᐊᑎᒋ ᐅᖅᑰᓐᓇᑦᑎᐊᕐᓂᖅᓴᖅ ᓴᓂᕋᖏᒃᑎᒍᑦ ᓱᕕᕐᓂᖃᙱᒻᒪᑦ. ᐊᖑᑎᓄᑦ ᐱᓕᕆᐊᖃᓗᐊᙱᓐᓂᖅᓴᐅᓕᖅᑐᓄᑦ ᐊᑲᐅᔪᖅ. ᐊᑎᒋᐅᑉ ᐊᑯᖓᓄᑦ ᑕᐃᒪᓐᓇ ᐊᑎᖃᖅᑎᑕᐅᕗᖅ.
ᐃᓄᑐᖃᐃᑦ ᐊᖑᓇᓱᒃᑎᓪᓗ ᐅᖃᖅᐸᓕᖅᑐᑦ ᑕᒪᒃᑯᐊᒎᖅ ᐃᒡᓗᓕᖕᒥᐅᓄᑦ ᐊᑐᖅᑕᐅᕙᒍᓐᓃᖅᑐᑦ. ᑭᖑᕝᕕᖅᑕᐅᓯᒪᓕᕐᒪᑕ ᓂᐅᕕᐊᖑᓯᒪᔪᓂᑦ. ᐊᐱᖅᓱᖃᑦᑕᖅᑕᑦᑎᓐᓂ ᑐᑭᓯᑎᑕᐅᓚᐅᖅᐳᒍᑦ ᑐᒃᑐᑦ ᐊᒥᖏᑦ ᐊᑎᒋᑦ ᐊᖑᓇᓱᒃᑐᓄᑦ ᐊᑲᐅᔪᐊᓘᓂᖏᓐᓂᒃ ᐅᖅᑰᓇᑦᑎᐊᕐᓂᖅᓴᐅᖕᒪᑕ ᓂᐅᕕᕐᕕᖕᒥᙶᖅᑐᓂᑦ.
