ᖃᒧᑏᒃ
ᑖᓐᓇ ᐱᓐᖑᐊᕈᓯᖅ ᑐᕌᖓᓚᐅᖅᑐᖅ ᓄᑲᑉᐱᐊᓄᑦ ᐃᓕᓐᓂᐊᖅᑎᑦᑎᔾᔪᑕᐅᓪᓗᓂ ᖃᓄᖅ ᑐᕌᒐᖃᕆᐊᖃᕐᒪᖔᑕ, ᐊᒻᒪᓗ ᐱᓕᕆᐊᒃᓴᖃᕆᐊᖃᕐᒪᖔᑕ ᕿᒧᒃᓯᖃᕐᓂᐊᕐᓗᓂ. ᐅᑯᐊ, ᑐᒃᑑᑉ ᐊᒡᓕᕈᖓ ᖃᒧᑎᙳᐊᖑᓪᓗᓂ, ᓇᑦᑎᐅᑉ ᓴᐅᓂᖏᑦ ᕿᒻᒥᙳᐊᖑᓪᓗᑎᒃ. ᐃᐸᕋᐅᑕᙳᐊᑯᓗᖃᖅᖢᓂ.
ᕿᒻᒥᙳᐊᓂ ᐊᖑᑎᙳᐊᑦ ᓇᑦᑎᐅᑉ ᑕᓕᕈᖏᓐᓂᙶᖅᖢᑎᒃ ᐊᕐᓇᓪᓗᙳᐊᓪᓗ ᓇᑦᑎᐅᑉ ᐊᒃᓴᖅᑯᖏᓐᓂᙶᖅᖢᑎᒃ. ᒪᕐᕉᖕᒥᒃ ᐊᖑᑎᙳᐊᖃᖅᖢᑕ ᒪᕐᕉᖕᓂᒡᓗ ᐊᕐᓇᓪᓗᙳᐊᖃᖅᖢᑕ. ᓴᐅᓂᖅ ᐊᖏᓛᖅ ᐃᓱᕋᖅᑐᔪᙳᐊᖑᓪᓗᓂ. ᐊᓄᙳᐊᑦ, ᐊᒥᕐᓂᑦ ᓴᓇᓯᒪᔪᑦ, ᐊᑐᓂ ᕿᒻᒥᕐᒥᒃ ᐊᓄᓯᓯᒪᓪᓗᑎᒃ.
ᓄᑲᑉᐱᐊᖅ ᐊᑖᑕᒥᓂᒃ ᑕᐅᑐᒃᐸᒃᖢᓂ ᕿᒻᒥᒥᓂᒃ ᑲᒪᑎᓪᓗᒍ ᐃᒻᒥᓂᒃ ᐃᓕᓐᓂᐊᓕᖅᖢᓂ ᐃᔾᔪᐊᖅᐸᒃᖢᓂᐅᒃ ᐊᑖᑕᓂ ᐱᙳᐊᖅᖢᓂ. ᐃᓚᖏᑦ ᐅᖃᖅᐸᒃᑐᑦ ᓄᑕᕋᐅᓂᕐᒥᓂᒃ ᐱᙳᐊᑐᐊᕆᕙᓚᐅᕐᓂᕐᒥᓂᒃ ᑕᒪᒃᑯᐊ.
ᒫᓐᓇ, ᓱᓕ ᑕᒪᒃᑯᐊ ᓴᓇᔭᐅᓪᓗᑎᒃ ᐊᑐᖅᑕᐅᕙᒃᑑᒐᓗᐊᑦ, ᑕᐃᒪᐃᒐᔪᙱᓐᓂᖅᓴᐅᓕᖅᑐᑦ ᑕᐃᔅᓱᒪᓂᓂᑦ.
