ᑲᐃᕝᕙᓱᒃ ᐊᑎᒋ
ᐊᑎᒋ ᐃᓗᓪᓕᐅᓪᓗᓂ ᐊᑐᖅᑕᐅᕙᓚᐅᖅᑐᖅ. ᐊᕐᕌᒍᓕᒫᖅ ᓄᑲᑉᐱᐊᓄᑦ ᐊᑐᖅᑕᐅᕙᒃᖢᓂ ᓇᖕᒥᓂᖅ ᐊᓐᓄᕌᕈᓐᓇᖅᓯᔪᓄᑦ, ᐃᒻᒪᖄ ᐊᕐᕕᓂᓕᒃ ᐊᑕᐅᓯᓪᓗ ᐅᑭᐅᓕᖕᓄᑦ.
ᐊᐅᔭᒃᑯᑦ, ᐊᑎᒋᑑᓪᓗᒍ ᐊᑐᖅᑕᐅᕙᓚᐅᖅᑐᖅ. ᐅᑭᐅᒃᑯᑦ, ᖁᓪᓕᑦᑕᕐᒥᒃ ᖄᖓᒍᑦ ᐊᑐᖅᖢᑎᒃ, ᒥᖅᑯᖓ ᓯᓚᓪᓕᐅᖔᖅᖢᓂ. ᑖᓐᓇ ᑕᐃᔭᐅᔪᖅ ᑲᐃᕝᕙᓱᖕᒥᒃ, ᐱᐅᓴᖅᓯᒪᓇᓂ, ᓰᒃᓯᒪᓇᓂ, ᓯᕗᕌ ᑐᓄᐊᓗ ᓇᓕᒧᒌᒃᖢᑎᒃ. ᐃᓄᑐᖃᕐᓄᑦ ᑕᒪᒃᑯᐊ ᐊᑐᖅᑕᐅᕙᓚᐅᖅᑐᑦ.
ᓇᓴᖓ ᑯᑯᒃᐹᖃᖅᑐᖅ, ᐊᖑᑎᓄᑦ ᐊᓐᓄᕌᓕᐅᕈᓯᐅᕙᒃᑐᑐᑦ. ᓂᒡᔭᐃᑦ ᓱᕕᔾᔭᐃᒃᑯᑕᐅᔪᑦ.
ᒫᓐᓇ, ᐊᖑᑎᑦ ᑕᐃᒪᐃᑦᑐᓂᒃ ᐊᓐᓄᕌᖅᓯᒪᕙᒍᓐᓃᖅᑐᑦ. ᑭᓯᐊᓂ, ᐊᑎᒋᖃᖅᐸᓕᖅᑐᑦ ᖃᓪᓗᓈᖅᑕᔭᖕᓂᒃ, ᐃᓛᓐᓂ ᐊᓈᓇᐅᔪᓄᑦ ᐃᓚᒋᔭᐅᔪᓄᓪᓗ ᒥᖅᓱᒐᐅᕙᒃᖢᑎᒃ.
