Natalino Piugattuk: Tagva uqausirinialiqtara taanna iparautaq qimuksiqtumik
atuqtauvalauqtuq. Qimuksiqtuqsiutituinnaq inungmut
iparautaunngit... inungmik iparaqtuutaunngittuq
qimminik kisiani ajurunniiqsaunasukłuni tusaanngisaraangatalu
iparariaqpakługit taimannaittuujutuqaungmat taanna iparautaq
atiqaurillunittauq suuqaimma iparautaaluungmigami.
Iparautaaluungmigami atiqaurilluni. Taanna sanasimaninga
una tagvunga tikiłługu kangiriłłaqpaa. Kangiringmagu ipuqaqłuni
ipuqaqłuni kangia taanna. Qimminut iparautausuuq. Tagva tamanna
akłunaanga iparautaqtarilluniuk takanunga tuaglisimagami
tuaglisimaninga malikługu, iparautaugaluarami takanna tuanninga
tuanninga tainiqarilluni "suluraq". Suluraulluni takanna tuanninga
takanuuna. Tagva tamaunga tikisungaqługu suluraq. Taanna tagva sulurauninga
taimannaittuulluni. Qimuksiqtunik atuqtausuuq qimmillu
sangujumajunniikatasuungungmata naliangnut maungaluunniit avunngaunasukkaluaqłuni
avungangaaq sangujaliraangata tamaunga iparariaqpakłuni
amma avunngaujumalluni qimmit sangujunniiraangata taanna aqtuqługu
niulaunngiinnaraluaqłuni ingirrannaqłuni tauvunga upagumajarmut
taassuma ikajuqłuniuk. Ikajuutiuna qimuksiqtumut tamanna atia tagva
uqausirisaarakku suqquisaqsijuksauvuq. Takłiluałłarnialirama.