Deborah Qaunaq: Asuilaak, uvangakuluugama Uirngut Qaunnaq Tipuula, Tipuula Qaunnaq
uvangakuluugama. Una uqausirijumagakku. Taanna isumagijauqattaqsimangmat
qanuittuungmangaat. Qanuimmat taimaittuqaqpa? Aullaaqattaqłuni
ukiukkut taanna atugauvalaurmingmat ukiukkut aullaaqattaqłuni.
Amaqaqłuni nutarakulungmik qumikłuni pualuungnik inigijauvalauqtuq.
Kisutuinnarmik jagattariaqangittumiglu aullaaqattarniaqłutik
qimuksikkut taanna puurijauvalaurmat. Avalluq, avallurmik taijaulluni.
Una taissumani atuutilialuulauqsimajuviniungmat, nalujutigulli
kisuungmakkiaq una taimairaalukpa? Kisualukiaq una?
una ikpiarjuk. Pualukkuvik. Nutarakulungmik qumingniaqłuni
aullaami ukiukkut pualukkuviuvalauqtuq amma jagajjaangittunik
ikkitirujungmilluunniit sururiaqangittunik aullaaqattami puurijauvalauqtuq.
Avalluq, avallurmik taijaulluni. Taissumani taikkua sivulialukput
Sivullimmarikput taimaittumik piqaluaqpangnirmata Innait
nutaraungittut, Innait nutaraqaqtut. Taanna atuqtauluaqpalauqtuq
avalluq. Imannaittuinnarmiglu amma piqarunnalauqłuni
una qarlik. Qarligillugu tappaunga qarlingmut aktungiqsimattiaqługu
uvuuna taanna ilakuuraarjungmat ipiutaqanngimmat attungirvinganik una
pitaqangittuq. Aktungirvinganik paunga pitaqariaqaqtuugaluaq.
Taanna avalluq pualukkuviviniq taissumani. Maannali atujaarunniiqtuq
maannakkulli atuqtauvajaarunniiqtuq taanna. Taissumani kisiani
sivulittinnit sivulimmarialuttinnit atugalluataulauqsimajuq.
Allaaqattami nutaraqaqtumik arnaqsiutaungmat. Aullaaqattami
amaqaqtumik qarligijauvalauqtut ukiukkut atuqtauvalauqtuq.
Taanna uqausirijumaluałłaqpara. Qanuimmat una taimannairaalukpa?
Una pualukkuvik. Nutarakulungmik qumingniaqtaminik qulittaaqłuni
atigisimaluniluunniit nutarakulungmik qumingnialirami pualuungni
tagvunngaqłunigik qumiikłuni. Pualukkuvik, ikpiarjugijavalauqtuq
taanna, uvanga taanna atulauqsimanngitara nutaaluaruluugamali [iglaqpuq]
taanna atulaunngitara. Kisianili amautitaqa... arnaqsiutimik
amautitaqariaqaqtuugaluaq suurlu taanna. Qujannamiik tamakkuninga
qaujititauvaalliqsimaliratta. Tamakkua amiit taissumani uqquuniqpaangulaurmata
annuraarillugit. Qitummaksariaqaqattalauqsimałłaqput.
Tamakkua uqquuniqpaaraaluulaurmata taissumani. Annuraalluataulauqtut
upirngaakkut saggalaakulungnik qaliraaqaqpanngittualuugamik
Saggalaakulungnik qaangagut annuraamik annuraaqaqpalauqtut
Qaliruaq. Qaliruarmik taijaullutik. Anaanaga taimaittuqaqpalauqtuviniq.
Saggalaakulungnik upirngaakkut ukiuqsiutiunngittunik upirngaakkut
saggalaakulungnik taimanna saatigijunik annuraaqaqtitauvalauqtuit.
Piujualuit, uqiłłutiglu suvingiłłutiglu uqquullutiglu.
Maannali taikkua pitaqaqtitaujaarunniiqtut atuqtitaujaarunniiqtuit.