Natalino Piugattuk: Una puarrisiuqquujijuq takujavut una igluvigarmi
igluvigaliuqtunut igliliurutiviniq, naittuugami
unalu paaniujaliuqłuni apummillu puarrisiuguni
qalusiqattarniarmat maunajjuumi una pisimanajarmat
taannali igluvigarmi tangmaaqsaqtuni angijurulungmik ilangit
igluliuqpalaurmata uqquusinnaqtualuungmat apummik pilirilluni
taimanna naluktaujatuinnaqługu uqquusinnaluannginniqsaungmat
puarrisiqaqłuni puarrisiliuqsimallutik sinigviginiaqtamingnik
igliliuqłutik apummik. Igluvigaq pianiksimaliraluaqtillugu
ilua taqqanna pijarituarjungmingmat taassumanga puarrisimut
tappangna iliuqqaivigillugu savingmut surattiallalauqłunijjuk
puarrisimut tappaunga iglirmuaqtiliqpakłunijjuk taimanna taanna
pijuviniq puarrisillattaangunginnami taimannaittuq
nalunanngittuq. Imanna iglirmik surattialuglugu imanna
imannaunnanngimmingmat. Ajjigiiktinnasukługu nalimugiiktinnasukługu
pijariaqarmingmat. Aput tappaunga suraktiriaqturlugu ajjigiinngiruluujaalugluni
pijammat. Puarrijakatakługu nalimuliqtiłługu pijariakinniqsaungmat
tagva taanna taimanna atuqtauqattaqtuviniq
Aputaijaijjutauruluujaramilu mannigijauttiaqłuni atuanikkaangat
namut ilittiaqtaunginnaujaqłuni. Taqqaunga silamut
iksingnaqtauruluujaqpanngiłluni ilittiaqtaunginnaujaqłuni
tagvaksatuangungmat aputaijaijjut atuqtauruluujakataggujualuulauqtuq.
Una aulajukuluungmat ipua tigukatattiarnanngimmat
maaniikkanniarjukulukkuni tagva apummik pigiakatagluni
isangnanngittummarialuunajaqtuq paaniiluaqłunittauq
taqanarmingmat tagvani isuluakuluaniiłłuni apullu uqittunniiraarjujatturuluungmat
anginaaqtaqsimalluni. Ipiutanga takilluni tappauna kiviqasiuti
ikajuqtigimmaringmagu taanna ipiutangata takininga.
Takiniqsaulluni ipiutanga pigiaqattaqłuni isuarniqsaq
uvaniiłluni aput uqinngiarjukturuluulijammat taqanaqtukulungmik
taanna sanajaujuviniq taimannailingavuq. Maaniikkanniruni
taqananngipraallirlunilu apummiglu uqiksaqpaallirnaluni pinajaqtuq.
Iittiaq, kikkutuinnarnut atuqtaujunnaqłuni
kisiani mannigijaujukiaq una inuktitut uqausiqtaqaqpa?
Hilii uirngut? Mannigijaujuq qanuq inuktitut uqausiqtaqaqpa?
Pittiaqtaunasukkaangami mannigijauniraqpakłuni. Ii, taanna
iksingnaqtausimaniakulunngittuq tamaunga maniratuinnarmut
kisiani ilittianginnaujaqługu siningniaraluarutik
ilittianginnaujaqługu taanna kinguniqarijaulaangulaurmingmat atuqtauvaktunit.
Taimannaittuliurunnaqtut kisiani tarrijausiuqtauniaraangamik
tarrijausiuqtauniaraangamik taimannaittuliurunnaqtut
taimanna inutuinnarnilli atuqtaujunniiqtut tangmaaqattaqpagunniirmata
tangmaaqattarunniirmata atuqtaujunniiqtuq inungnit.